Aðalfundur Golfklúbbs Sauðárkróks var haldinn að Hlíðarenda 9. desember s.l. Um 20 félagar sóttu fundinn. Á fundinum kom fram að hagnaður af rekstri var ríflega 1,5 milljón króna, en áfram eru afborganir af lánum þungur baggi fyrir klúbbinn. Á síðasta ári voru nánast engar framkvæmdir við völlinn og tókst því að bæta fjárhaginn, en á síðasta ári var hallinn á rekstri klúbbsins um 2,6 milljónir króna. Ástæða þess halla var fyrst og fremst uppfærsla á lánum klúbbins.

Við blasir hins vegar að ráðast þarf í aðgerðir til að tryggja klúbbnum meira vatn, en þurrkasumur síðastliðin ár hafa gert það að verkum að mjög erfitt hefur verið að vökva flatir og brautir eins og nauðsynlegt er.

Á fundinum var ný stjórn kosin. Pétur Friðjónsson gaf áfram kost á sér sem formaður en aðrir í stjórn á næsta starfsári verða: Unnar Ingvarsson varaformaður, Ragnheiður Matthíasdóttir gjaldkeri, Dagbjört Rós Hermundardóttir ritari, Hjörtur Geirmundsson formaður unglinganefndar, Björn Sigurðsson formaður vallarnefndar og Bjarni Jónasson formaður mótanefndar, en hann kemur nýr inn í stjórn.

Skýrsla formanns, formanna nefnda  og reikningar klúbbsins verða birtar von bráðar hér á síðunni.

Skýrsla v aðalfundar GSS 2010

Aðalfundur GSS verður haldinn að Hlíðarenda fimmtudaginn 9. desember n.k. kl. 20:00.

Á dagskrá verða venjuleg aðalfundarstörf.

Þeir félagar sem hafa áhuga að taka þátt í störfum stjórnar og nefnda félagsins eru beðnir um að hafa sem fyrst samband við Pétur Friðjónsson í netfanginu petur@saudarkrokur.net

Glæsilegt afmælishóf GSS var haldið á Mælifelli síðastliðið laugardagskvöld. Skemmtu gestir sér konunglega undir góðri veislustjórn Gunnars Sandholts, sem samnýtti „gamlar kynningar frá Kórnum“ og golfsögur til að halda uppi góðri stemmingu. Forseti GSÍ Jón Ásgeir Eyjólfsson og gjaldkeri GSÍ, Eggert Ágúst Sverrisson mættu til leiks ásamt mökum sínum og heiðraði Jón Ásgeir af því tilefni nokkra félaga fyrir vel unnið starf. Gullmerki hlutu þeir. Magnús Rögnvaldsson, fyrir frumkvöðlastarf við uppbyggingu klúbbsins. Sigurjón Gestsson, fyrir störf að gróðursetningu á vellinum og Hjörtur Geirmundsson fyrir ríflega 20 ára starf innan stjórnar klúbbsins. Silfurmerki GSÍ hlutu þau Árný Árnadóttir fyrir að vera leiðandi í kvennagolfi, kynningarstarf og kennslu og Ásgeir Einarsson fyrir störf varðandi framtíðaruppbyggingu golfsvæðisins.

Í afmælinu var Steinar Skarphéðinsson gerður að heiðursfélaga GSS. Steinar var fremstur í hópi þeirra, sem unnu gríðarlegt starf við uppbyggingu golfvallarins að Hlíðarenda. Fyrir þau störf er honum þakkað með þessari viðurkenningu. Hélt Steinar ræðu þar sem hann lýsti fyrir  afmælisgestum þessum fyrstu árum að Hlíðarenda.

Á afmælinu voru jafnframt kynnt nöfn brauta er þau má sjá hér á síðunni. Endanleg ákvörðun um brautarnöfn bíður hins vegar aðalfundar.

Klúbbnum bárust góðar kveðjur og Stefán Pedersen gaf klúbbnum af þessu tilefni kvikmyndir frá bændaglímum á 9. áratug 20. aldar, sem mikill fengur er í.

Þá má geta þess að Rafn Ingi Rafnsson hlut sértök verðlaun og bikar, svokallaðan Háttvísibikar, sem veittur verður þeim kylfingi sem talinn er hafa sýnt af sér sanna íþróttamennsku og háttvísi. Bikarinn er farandbikar, sem verður veittur árlega.