50 ára afmælismót GSS

50 ára afmælismót GSS fór fram laugardaginn 27. júní. Þátttaka var frábær, 70 manns. Kylfingar glímdu við stífan vind úr ríkjandi átt framan af degi en svo lægði. Nýir teigar voru vígðir á fimmtu braut, sem gæti orðið uppáhaldsbraut margra við breytinguna. Þá voru ný glæsileg teigskilti tekin í notkun.  Keppendur voru ánægðir með völlinn, sérstaklega flatirnar sem eru í toppstandi. Vinningar voru glæsilegir í 6 verðlaunaflokkum og að auki voru nándarverðlaun og fjöldi útdráttarvinninga. Fyrirtæki sem styrktu mótið með vinningum voru TA Sport Travel, Úrval Útsýn, Jómfrúin, VÍS og Esja gæðafæði. Úrslit eru á síðu golfsambandsins golf.is en þess má geta að grípa þurfti til bráðabana í tveimur flokkum til að knýja fram úrslit.  Við verðlaunaafhendingu var boðið upp á glæsilega afmælisköku frá bakaríinu.  Allir skemmtu sér vel og fóru glaðir heim. 

Hluti keppenda á afmælismóti GSS. Alls voru 70 þátttakendur.
Afmæliskaka frá Sauðárkróksbakarí.

Categories: Félagsstarf Mótanefnd

Íslandsmót 15 ára og yngri

Íslandsmót golfklúbba 15 ára og yngri fór fram dagana 25-27. Júní á Garðavelli Akranesi. Golfklúbbur Skagafjarðar átti þar flotta fulltrúa. Drengjasveitin endaði í 13. sæti. Sveitina skipuðu þeir Alexander Franz Þórðarson, Axel Arnarsson, Bjartmar Dagur Þórðarson, Hallur Atli Helgason og Tómas Bjarki Guðmundsson. Liðsstjóri var Atli Freyr Rafnsson. Stúlknasveitin var sameiginleg með Golfklúbbnum Hamri Dalvík og enduðu þær í 5. sæti. Sveitina skipuðu Anna Karen Hjartardóttir, Dagbjört Sísí Einarsdóttir, Rebekka Helena B. Róbertsdóttir, Una Karen Guðmundsdóttir og Magnea Ósk Bjarnadóttir GHD. Liðsstjóri var Bjarni Jóhann Valdimarsson GHD. Krakkarnir sýndu leikgleði og prúðmennsku á vellinum og voru klúbbum sínum til mikils sóma.

Stúlknasveit GSS ásamt liðsstjóra.
Drengjasveit GSS ásamt Atla þjálfara og liðsstjóra

Categories: Börn og unglingar

Norðurlandsmótaröð barna

Fyrsta mót sumarsins í Norðurlandsmótaröð barna og unglinga fór fram sunnudaginn 14. júní. Þátttaka var góð og mættu krakkar frá Skagafirði, Akureyri og Dalvík. Spilað var í nokkrum flokkum í bæði 9 og 18 holu leik og kepptu 59 börn og unglingar, allt frá 5 ára upp í 18. Stærsti flokkurinn var byrjendaflokkur með 23 keppendur. Skagfirsku kylfingarnir stóðu sig með prýði og stefnir í gott sumar. Myndir frá mótinu eru inn á Facebook hópnum Golfmyndir GSS.

Categories: Börn og unglingar